"قاهرة المعز"

شارع المعز لدين الله 

شارع المعز - Al-Mu'izz ledin Illah Street - . من أهم الشوارع التاريخيه فى مصر و القاهره. لما بنى جوهر الصقلى القاهره المعزيه عمل فى سورها الشمالى بابين بعاد عن بعض و هما باب النصر و باب الفتوح. و فى السور الجنوبى عمل بابين جنب بعض اتسموا هما الاتنين باب زويله ، و عمل شارع رئيسى من باب الفتوح لباب زويله الشارع ده هو شارع المعز لدين الله.

شارع المعز اتعرف كمان باسم شارع الأعظم ، و شارع القاهره ، و شارع القصبه. جوهر الصقلى بنى على جانبه الشرقى قصر للخليفه المعز اتعرف باسم

  " القصر الشرقى الكبير " و ده لان ابنه العزيز بالله بنى قدامه " قصر صغير اتعرف باسم القصر الغربى الصغير ". بعد ما صلاح الدين الأيوبى قضى على الدوله الفاطميه فى مصر راح هو و اهله و امرا دولته سكنوا فى القصر الكبير و فضل القصر ده مقر لحكم الايوبيين لغاية ما اتبنت قلعة الجبل فوق جبل المقطم و سكن فيها الملك الكامل ابن اخو صلاح الدين و شويه شويه القصر الكبير اهمل لعاية ما اتهد و اتبنت فى المنطقه احياء و شوارع و مدارس و بيوت. شارع المعز ماكانش شارع القاهره الرئيسى و بس لكن امتداداته من ناحية باب زويله كان بيوصل للفسطاط و من ناحيه باب الفتوح لـ حى الحسينيه و الظاهر.

شارع المعز كان مليان دكاكين و أسواق لدرجة ان عدد المحلات من بره باب الفتوح لباب زويله كانت حوالى 1200 محل. طول الشارع من ميدان الجيش لأول العباسيه حوالى 4800 متر و فضل الشارع محتفظ بمكانته فى العصر المملوكى و كانت ليه تقاليد لازم تتراعى كان مثلاًممنوع تعدى فيه جمال محمله أو حصنه أو سقا مش مغطى روايته. و كان فيه قانون يحتم على اصحاب الدكاكين انهم ينوروا دكاكينهم بالقناديل طول الليل و يكون عند كل صاحب دكان زير مليان مايه مخصصه لمكافحة الحريقه لو شبت. و كان فيه عمال قمامه و نضافه و كناسين و حراس أمن.

شارع المعز أكتر شارع فى القاهره و مصر مليان تحف اثريه من العصور الوسطى و من العصر المملوكى بالذات. الشارع بيمتد من باب الفتوح لغاية باب زويله و المساحه دى بتضم شوارع باب الفتوح و أمير الجيوش و النحاسين و بين القصرين و الصاغه و الاشرفيه و العقادين و المناخليه و المنجدين و السكريه.

الاثار اللى ذكرها المقريزى فى الشارع هى : جامع الحاكم بأمر الله ، وكالة قايتباى ، بيت السحيمى ، جامع سليمان أغا السلحدار ، جامع الأقمر ، سبيل عبد الرحمن كتخدا ، قصر الأمير بشتاك ، جامع السلطان قلاوون ، مدرسة الظاهر برقوق ، تربةالصالح أيوب ، المدرسه الصالحيه ، المدرسه الكامليه ، مدرسة الناصر محمد بن قلاوون ، جامع الأشرف برسباى ، مدرسة و سبيل السلطان الغورى ، حمام المؤيد ، جامع المؤيد، و غيرها.

فى عهد وزير الثقافه فاروق حسنى إتعمل جهد ضخم لترميم أثار الشارع التاريخى وتم تطوير منطقته بعد ما كان تهالك بسبب الإهمال وقلة الإهتمام وبقى شكله يليق بمكانة مصر التاريخيه.

شارع المعز اهم مناطق القاهره الاسلاميه اللى ضمن مواقع التراث العالمى التابعه لمنظمة اليونيسكو من سنة 1979.